అసెంబ్లీ వద్ద తీవ్ర ఉద్రిక్తత.. విద్యార్థులపై లాఠీ ఛార్జీ.. ఆడవాళ్లపైనా.

అఖిల భారత విద్యార్థి సంఘం నేతలు (ఏబీవీపీ) బుధవారం అసెంబ్లీ ముట్టడికి యత్నించారు. టీఆర్ఎస్ ప్రభుత్వం విద్యారంగాన్ని నిర్లక్ష్యం చేస్తోందని డిమాండ్ చేస్తూ విద్యార్థులు పెద్ద సంఖ్యలో బుధవారం మధ్యాహ్నం అసెంబ్లీ వద్దకు చేరుకున్నారు. భద్రత కోసం ఏర్పాటు చేసిన భారీ కేడ్లను తోసేసి అంతా మూకుమ్మడిగా తోసుకొని వచ్చారు. అసెంబ్లీ గేట్లు ఎక్కి లోనికి వెళ్లేందుకు ప్రయత్నించడంతో పోలీసులు అడ్డుకొని విద్యార్థులను వెనక్కు నెట్టారు. ‘వీ వాంట్ జస్టిస్ (మాకు న్యాయం కావాలి)’ అనే నినాదాలతో ఆ ప్రాంతం మార్మోగిపోయింది. అన్ని వైపుల నుంచి విద్యార్థులు గుంపులుగా ఏర్పడి బలంగా దూసుకురావడంతో వారిని అదుపు చేసేందుకు పోలీసులు లాఠీ చార్జీ చేయాల్సి వచ్చింది.అయినా అదుపులోకి రాని విద్యార్థులు మళ్లీ మూకుమ్మడిగా గేటు తోసుకొని లోపలికి వెళ్లేందుకు ప్రయత్నించారు. దీంతో పోలీసులు వారిపై లాఠీ చార్జి చేశారు. దీంతో విద్యార్థులంతా నేలపై కూర్చొని నినాదాలు చేశారు. మహిళా విద్యార్థినులు కూడా అసెంబ్లీ ముట్టడికి వచ్చిన వారిలో ఉన్నారు. వారు అసెంబ్లీ గేటు వద్దకు చేరుకోవడంతో మహిళా కానిస్టేబుళ్లు బలవంతంగా వారిని వెనక్కు తోశారు. విద్యార్థుల్లో యువతీ యువకులు రోడ్డుపై కూర్చొని పెద్ద ఎత్తున సీఎం డౌన్ డౌన్ అని నినాదాలు చేస్తుండడంతో వారిని బలవంతంగా లాక్కెళ్లి ప్రత్యేక వాహనం ఎక్కించారు. ఓ దశలో విద్యార్థులను అదుపు చేయడంలో పోలీసులు తీవ్రంగా శ్రమించారు. లాఠీ చార్జీ చేస్తున్నా విద్యార్థులు అసెంబ్లీ లోనికి ప్రవేశించేందుకు యత్నిస్తునే ఉన్నారు. దాదాపు అరగంటలకు పైగా తీవ్రమైన ఉద్రిక్త పరిస్థితులు నెలకొన్నాయి.